Wasiirka wasaaradda Cadaalada iyo arrimaha Dastuurka ee Xukuumadda Soomaaliya  Xasan Macalin Maxamuud,  ayaa weerar afka ah ku qaaday siyaasiyinta mucaaradka ee dalka.

Wasiirka ayaa ku eedeyay xubnaha mucaaradka ee kasoo horjeeda doorashada Qof iyo Cod inay jidgooyo u dhiganayaan shuruuc ay meel mariyeen Xukuumadda iyo Baarlamaanka Soomaaliya.

Waxa uu carabka ku adkeeyay wasiir Xasan Macalin, in aysan jirin ciidan ama cid is hor-istaagi karto hannaanka dimoqraadiyada ee lagu soo dooranayo Baarlamaanka iyo qabashada doorashada Qof iyo Cod.

Sidoo kale waxa uu tilmaamay inay muhiim tahay in la ilaalyo jawi doorasho oo xor iyo xalaal ah, isaga oo muujiyay sida ay uga go,an tahay dowladda Soomaaliya iyo dhammaan muwaadiniinta inay helaan fursad ay uga qey-qataan hannaanka doorashada iyada oo aysan jirin waxa caga-jugleeyn iyo faragelin.

Wasiir Xasan Macalin ayaa ka dhawaajiyay in fikirkaan uu yimid waqtigii loo baahnaa, isla markaana aan la hor-istaagi Karin.

Sikastaba, dowladda Soomaaliya iyo mucaaradka ayaa maalmihii lasoo dhaafay waxa ay warbaahinta  isku marinayeen dhaliilo kulkul  oo quseeyay arrimaha doorashada dalka.