Dhowaan koox burcad badeedda Soomaali ah, ayaa afduubtay Markab Kalluumeysi oo laga lee yahay Dalka Shiinaha, kaasi oo burcad badeeda ka qafasheen xili uu ku sugnaa xeebaha Maamulka Puntland ee Soomaaliya.

Markabkan oo ay saarnayeen 18 shaqaalo ah oo u dhashay Shiinaha ayaa ku guda jiray howlo la xiriira Kalluumeysi, isaga oo ruqsad ka heystay Wasaaradda Kalluumeysiga ee Maamulka Puntaland, sida ay xogaha shegayaan.

Sarkaal u hadlay wasaarada kalluumeysiga Puntland ayaa sheegay in ay kasoo horjedaan in madax furasho la siiyo burcad badeedda,isaga oo hoosta ka xariiqay inay doonayaan inay si qasab ah ay ku soo furtaan Markabka.

Sidoo kale waxa uu tilmaamay in haddii lagu guuleysan waayo in burcad badeedda  ay si nabad ah uga dagaan Markabka, lagu fasaxi doono Ciidamada Puntland ayna weerari doonaan.

Shirkadda leh Markabka, ayaa sidoo kale lagu wargeliyay in wax madax furasho ah aysan siinin burcad badeedda, hayeeshe wararka qaar ayaa tilmaamaya in lacag dhan hal milyan oo dollar ay diideen burcad badeedda.

Markabkan ayaa hadda lagu heysta xeebaha Degmada Eyl, waxaana warar kala duwan ay shegayaan in ganacsato reer Puntland ah ay dhankooda wadaan dedaalo lagu siideynayo Markabka, madaama la tilmaamay in howla Kallumeysiga Markabkan  waday ay ku lug leeyihin.