Warar dheeraad ah ayaa kasoo baxaya howlgal ay fuliyeen ciidamo katirsan NISA, qeybtooda  Galmudug, kaasi oo ay ku soo qabteen gaadiid u socday kooxda Al-shabaab.

Wararka ayaa waxa ay intaas ku darayaan in ciidanka ay deegaan hoosyimada degmada Baxdo ku qabteen ilaa iyo labo gawaari oo shidaal iyo agabyo al-shabaab u siday.

Labada gaari iyo raggii waday ayaa la sheegay in loo gudbiyay taliska ciidanka NISA ee degmada Cadaado ee gobolka Galgaduud ee bartamaha Soomaaliya.

Sidoo kale saraakiisha hoggaamineysay howlgalka ayaa sheegay in gadiidka iyo raggii siday ay ku hayaan baaris kala duwan, isla markaana maxkamadda loo gudbin doono.

Ciidanka xoogga iyo kuwa daraawiishta Galmudug, ayaa maalmihii lasoo dhaafay waxa ay howlgalo culus ka wadaan aaga degmada Wasil, iyada oo howlgalkaasi uu yahay mid ay ku beegsanayaan xubnaha katirsan Al-shabaab ee ku sugan halkaasi.