Kulanka maanta ee golaha wasiirada ee xukuumadda federaalka Soomaaliya uuna shir guddoominayay Ra’iisul wasaaraha Soomaaliya Xamsa Cabdi Bare, ayaa lagu ansixiyey soo jeedinta Wasaaradda Arrimaha Gudaha, Federaalka iyo Dib-u-heshiisiinta ee ku aaddan magacaabista Guddoomiyaha Hey’adda Qaxootiga iyo Barakacayaasha Soomaaliyeed

Axmed Xuseen Cilmi, ayaa loo ogolaaday inuu noqdo Guddoomiyaha Hay’adda Qaxootiga iyo Barakacayaasha Soomaaliyeed.

Sidoo kale, Golaha Wasiirrada, ayaa ansixiyay soo jeedinta Wasaaradda Maaliyadda ee ah in Marwo Xaniifa Maxamed Ibraahim, ay xubin ka noqoto Guddiga Sare ee Bangiga dhexe ee Soomaaliya.

Sidoo kale inta uu kulanka golaha wasiirada socday ayaa lagu soo bandhigay warbixinno kala duwan oo la xiriira, qiimeynta wax-qabadka Wasaaradaha Dowladda— sharciga nidaamka Xukuumadda iyo abaabulka iyo wacyigelinta bulshada ee ku aaddan doorashooyinka qof iyo codka ah ee la doonayo in dalkeenna laga hirgaliyo.