Taliyaha ciidanka xoogga dalka Ganeral Odowaa Yuusuf  Raage, ayaa xilkii ka qaadey Gaashaanle Carab Dheeg Axmed oo ahaa Taliyihii ururka 162aad ee Kumaandooska Danab, kaas oo fadhigeedu ahaa magaalada Kismaayo ee gobolka Jubbada hoose,

Xilka qaadista Taliye Carab Dheeg ayaa imaaneysa xilli uu shaley dhaliilay go’aan ay dawladda Xasan Sheekh ku dalacsiisay askar la sheegay in ay ka soo goosteen dawlad goboleedka Jubaland dagaalka siyaasadeed ee Axmed Madoobe dartiisa.

Taliye Carab Dheeg ayaa tallaabadaas ku tilmaamay mid nasiib darro ah, isagoo xusay in askarta xoogga dalka ee ka dagaallanta furumaha hore ee dagaalka AS sannado badan la iska indha-tiray dalacsiintooda, iyagoo muddo baryay, Wuxuu cambaareeyay falkaas, oo ku sheegay mid niyada iyo kalsoonida ciidamada Xoogga dalka Soomaaliyeed jebinaya.

Taliyaha cusub ee Ururka 162-aad Ee Kumaandooska Danab ayaana loo magacaabey Cariif Hire oo kamid ahaa Saraakiisha ururka 162-aad ee fadhigoodu yahay Magaalada Kismaayo ee gobolka Jubbada Hoose.