Nairobi, Kenya – (Onkod Radio) – Baarlamaanka Madaxa Bannaan ee Dhallinyarada Afrika ayaa siiyay abaalmarinta qiimaha badan ee Humanitarian Visionary Award (Abaalmarinta Aragtida Samafalka) Senator Xasan Idow Maxamuud Kobac, oo ah ganacsade, siyaasi iyo shaqsi u taagan horumarinta bulshada, xilli shir heer sare ah uu ka dhacay magaalada Nairobi ee caasimadda Kenya.
Shirkan oo socday muddo saddex maalmood ah ayaa isu keenay in ka badan 50 hoggaamiye dhallinyaro, siyaasiyiin, aqoonyahanno iyo xubno ka tirsan bulshada rayidka ah oo ka kala socday waddamada Afrika, waxaana lagu falanqeeyay xalalka dhallinyaradu horseed u tahay oo ku aaddan caqabadaha waaweyn sida waxbarashada, shaqo la’aanta, hoggaaminta, dimuqraadiyadda, isbeddelka cimilada, iyo hal-abuurka dhijitaalka ah.
“Waxaan si weyn ugu faraxsanahay in la i siiyo abaalmarintan muhiimka ah, taasoo ah aqoonsi ku wajahan shaqada samafalka ee aan ka waday Soomaaliya muddo ka badan toban sano, sidoo kale waa dhiirrigelin iyo qaddarin loo sameeyay dhammaan shaqaalaha samafalka ah,” ayuu yiri Xasan Idow Maxamuud Kobac.
“Ujeeddadaydu waa in aan dadka Soomaaliyeed u abuuro nolol wanaagsan oo dib loogu soo celiyo sharaftooda,” ayuu hadalkiisa sii raaciyay, isagoo tilmaamay in hoggaaminta daacadda ahi ay tahay mid wax ka baddasha nolosha dadka.
Senator Kobac wuxuu noloshiisa u huray horumarinta bulshada nugul. Wuxuu aasaasay Hay’adda Hassan Kobac Foundation (HKF) oo noqotay iftiin u iftiimay kumannaan qoys oo ay saameeyeen abaaraha, barakaca iyo saboolnimada.
Xilli uu dalka ka taagnaa abaar ka mid ah kuwii ugu halista badnaa taariikhda dhow, HKF waxay gaarsiisay biyo nadiif ah iyo raashin gargaar ah kumannaan qoys oo ku nool gobolka Hiiraan ee bartamaha Soomaaliya.
Bishii Febraayo ee sanadkan, Ururka Dhallinyarada Hiiraan ayaa xaflad weyn oo lagu maamuusayey guulaha Senator Xasan Kobac ku qabtay magaalada Beledweyne. Munaasabaddaas waxaa kasoo qeybgalay qeybaha kala duwan ee bulshada, aqoonyahanno iyo dhallinyaro, waxaana lagu ammaanay shaqada uu senator Kobac ka qabtay afartii sano ee uu ku jiray aqalka sare ee Baarlamaanka Federaalka Soomaaliya.
Xasan Kobac waxaa lagu tilmaamaa codka dhabta ah ee shacabka Hirshabelle – isagoo si joogto ah ugu taagan difaaca xuquuqdooda iyo horumarinta noloshooda. Dadaalkiisa ku aaddan awoodsiinta dhallinyarada iyo horumarinta bulshada ayaa u kasbaday ixtiraam iyo taageero ballaaran.