Faahfaahin dheeraad ah ayaa kasoo baxaya khasaarihii ka dhashay dagaalkii shalay ka dhacay Raskambooni oo ahaa Fadeexad Qaran, waxaana hadda 2da dhinac ee Jubbaland iyo Dowladda Federaalka ay isku haystaan cida lagu wareejinayo saraakiishii ciidanka Dowladds Federaalka Soomaaliya hogaaminaysay iyo askartii galay xadka dalka Kenya.

Jubbaland, ayaana doonaysa in dhammaan lagu wareejiyo ciidankii dagaalamay iyo saraakiishii u sareysay Raskamboni jooga ee Dowladda sida lagu arkay baraha bulshada saraakiisha ayaa laga dhigay hubka markii ay xadka galeen, qaarkood oo dhaawacyo kooban qaba ayaana la daweeyey.

Dowladda dhexe, ayaa doonaysa in ciidanka iyo Askartan la geeyo goob leh garoon diyaaradeed oo dib loogu celiyo magaalada Muqdisho, taas oo ay dadaal badan galinayso.

Dhinaca kale qeyb kamid ah ciidamada xoogga dalka ayaa la xaqiijiyey in dhaawacyadooda saaka loo qaaday magaalada Kismaayo, iyadoo ay jiraan askar cusub oo miyiga u firxaday oo qaarkood cabsi laga qabo in ay kooxaha argagixiso gacanta u galeen.