Muqdisho (Onkod Radio) — Ciidamada Booliska Soomaaliya oo howlgal ka sameeyay degmada Dayniile ee gobolka Banaadir ayaa ku guuleystay soo qabashada haweeney fal argagax leh dhowaan ka geysatay halkaas, kaddib muuqaal lagu baahiyey baraha bulshada.

Muuqaalka ayaa waxaa laga dhex arkayay haweeneydaan oo lagu magacaabo Shukri Cabdullahi Xaashi oo tacaddi xun u geysaneyso gabar yar oo 9 sano jir ah.

Sidoo kale caro xooggan ayaa ka dhalatay muuqaalka la soo duubay haweeney eedeysane ah oo dusha uga fadhido, isla-markaana garaaceyso gabadha yar oo xilligaas ilmeyneysay.

Afhayeenka ciidanka Booliska Soomaaliyeed, Sadiiq Doodishe ayaa shaaca ka qaaday in haweeneyda ku eedeysan falkaaas arxan darrada ah, ee carada xooggan ka dhaliyay Baraha Bulshada ay hadda ku xiran tahay xarunta hay’adda dambi baarista CID isagoo sheegay inay baaris ku hayaan.

Sadiiq Doodishe ayaa sidoo kale tilmaamay in shacabka Soomaaliyeed ay la wadaagi doonaan natiijada baaritaankooda iyo ujeeddada ka dambeysa dhacdadaasi.

“Waxaan dhowaan shacabka u soo bandhigi doonaa ujeeddada iyo natiijada ka dhalatay baarista kiiskaan,” ayuu yiri afhayeenka ciidamada Booliiska Soomaaliyeed.